全職媽媽心聲:24小時On Call湊小朋友辛苦過返工!

女性係非常感性嘅動物,對愛情同婚姻都有執着。好多女性喺結婚之後為咗家庭同埋子女都會放棄工作同興趣,成為全職媽媽。以前生活自由自在,生咗小朋友就進入二十四小時鐵人媽媽生活。

老公因為工作忙,都會將子女交俾老婆一個人照顧。老公就成為「偽單身」,明明結咗婚,但就過住單身自由自在嘅輕鬆生活,老婆就背負起「單親媽媽」嘅尋重負擔。

好多長輩都話:「以前生三四個咪又係咁樣湊大,點解你先湊嗰一兩個就已經嗌攰嗌辛苦!」而家嘅環境變晒,小朋友唔係敏感就過度活躍,點會叫做好湊啲呢?真係要請教一下長老們。

你知唔知道我哋有幾大壓力?小朋友成績唔好就係媽媽冇幫佢溫書睇功課;小朋友病咗就係媽媽照顧得唔好;小朋友冇規矩就係媽媽唔識教。點解全職媽媽仆心仆命為頭家反而會受到冷言冷語?

我最鍾意嘅時間就係子女瞓覺之後,因為係唯一一段自由、心情放鬆、無人打擾嘅時段。就算好攰都唔捨得入房瞓覺。全職媽媽們係咪都同我一樣,好享受呢段夜闌人靜,真正屬於自己嘅me time?

當一個女人太顧家嘅時候老公就會變得太輕鬆,將屋企所有事務都交俾老婆照顧。結婚前喺工作上係女強人,結婚後就係屋企嘅女強人,你唔覺得攰嘅咩?所以,女人冇必要逞強,將部分責任放低並唔代表你無能,將呢個責任交返俾老公,子女係夫妻共同嘅責任,或者佢唔單止唔會嫌棄你,仲可能會心甘情願接受。

全職媽媽係一份24小時on call嘅工作,老公應該俾老婆一啲空間,關心佢嘅情緒,重視佢、尊重佢同埋多啲鼓勵佢!

 

資料來源:GreatDaily

相關文章