【媽媽愈懶,家庭愈幸福?】

聽人講,媽媽愈懶,家庭就愈幸福。其實呢句說話唔係冇根據,我哋可以從三個方面去分析:

1. 媽媽懶,爸爸更勤力

其實好多懶老公,都係由勤力嘅老婆縱出嚟。可以試下畀多啲機會老公幫忙,相信佢可以做得好,如果你唔信佢,佢就會因為冇自信而無法投入參與同埋分擔工作;如果你因為佢做得唔好而責怪佢,佢就唔會再想幫你。所以,應該要多啲鼓勵同埋表揚你嘅老公,例如佢唔擅長煮飯,但係都肯幫手,咁你就要多啲鼓勵佢,佢哋會更加有幹勁同埋信心去做,甚至會主動去幫你手。

2. 媽媽懶,小朋友更獨立

勤力嘅媽媽習慣將小朋友由頭到腳、由裏到外都照顧得妥妥當當,咁樣會令到小朋友對媽媽嘅依賴性變得更強。唔係要媽媽乜嘢都唔理,而係要學識適當咁放手,一方面可以令媽媽輕鬆啲,另一方面又可以提升小朋友嘅生活自理能力。另外,當小朋友遇到困難嘅時候,媽媽唔應該第一時間想辦法幫小朋友解決問題,而係「引導小朋友去解決問題」,咁樣可以令小朋友學識獨立思考、用自己嘅智慧同埋能力去解決問題,日子耐咗,佢哋會變得更加有自信同埋有成就感。

3. 媽媽懶,家庭更幸福

會偷懶嘅媽媽,唔會一邊博命做家務、一邊埋怨同黑面;佢哋唔會淨係圍繞住老公同埋小朋友氹氹轉,令到自己成為一部不停做嘢嘅工作機器、或者一個全年無休嘅工人,佢哋會留返啲時間畀自己。媽媽心情愉快,無論對婚姻、家庭定係小朋友都會有正面嘅影響。間中偷吓懶、適當咁放手,唔單止可以令自己更加輕鬆,屋企嘅氣氛都會更和諧。

 

資料來源: 今周文

相關文章