【羽絨唔可以乾洗!洗羽絨有6點一定要注意】

洗羽絨唔係一件容易嘅事,如果洗得唔啱,可能會洗傷件衫。另外,羽絨唔可以乾洗,如果唔係就會影響佢嘅保暖性。我哋嚟睇睇洗羽絨嘅正確方法啦!

洗羽絨一定要注意6點

1. 最好用手洗

羽絨千祈唔好乾洗,因為乾洗用嘅藥水會破壞羽絨入面嘅蛋白質,影響保暖功能,另外烘乾嘅過程都會容易令布料老化。而用機洗同埋滾筒式乾衣,羽絨俾機擰攪之後,入面嘅填充物會變得厚薄唔平均,咁樣會令到件羽絨走樣,影響美觀同埋保暖性。所以,用手洗係最好嘅選擇。

2. 水溫最好喺30℃

將洗衣液或者洗衣粉加入30℃(86°F)嘅暖水入面,再將羽絨放入去,浸15分鐘,然後用軟身嘅刷輕輕刷。注意一點,唔好用手去搓件羽絨。漂洗都要用暖水,可以幫助洗衣液或者洗衣粉充分溶喺水入面,咁樣件羽絨先至會容易洗得乾淨。

3. 用中性嘅清潔劑

洗羽絨唔好用鹼性偏高嘅清潔劑,避免洗去羽絨上面嘅脂肪層而變得脆弱,另外,鹼性嘅清潔劑會容易喺衣物表面留低白痕,影響外觀。中性嘅清潔劑對衣物同埋羽絨嘅傷害最細。最好揀羽絨專用嘅清潔劑,洗完之後可以保持羽絨面嘅光澤同埋裏面蓬鬆嘅狀態。

4. 過水時加少少醋

喺用清水洗第2次嘅時候,加兩羹醋,用屋企食用嘅醋就得,將羽絨放喺入面浸5至10分鐘,然後輕輕摔幾下。

5. 唔好扭乾

羽絨洗乾淨之後,唔好好似平時咁扭乾,應該順住羽絨嘅紋路雙手對壓,就可以將羽絨入面嘅水壓出嚟。

6. 唔好暴曬

洗乾淨嘅羽絨唔好放喺陽光下面曬,放喺通風嘅地方晾乾就得;千祈唔好用燙斗燙,因為有機會會燙燶。將羽絨晾乾之後,放喺床上面,用個大衣架均勻咁拍打。

 

資料來源:大紀元

相關文章