【父母偏心係天性?】研究:「95%父母都係偏心!」

【父母偏心係天性?】研究:「95%父母都係偏心!」

俗話有云:「手心又係肉,手背又係肉。」但有研究指出:「天下的父母絕對是偏心的。」

《手足效應》(The Sibling Effect)嘅作者傑弗里‧克魯傑表示:「世界上95%嘅父母都有偏心其中一個小朋友;而其餘5%都講緊大話。」作者可能有為咗戲劇化效果而誇大數字,不過儘管每個父母都強烈否認自己有偏心,科學研究顯示,傑弗里‧克魯傑所講嘅離真相並不遠。

傑弗里‧克魯傑表示,父母偏心係有規律可循,但成因複雜,其中包括基因、排行、性別、性格、健康程度,甚至樣貌。另一項調查發現,父母最寵愛同自己性别相反嘅小朋友,即使冇一位父母願意承認,但其實子女們總會感覺到邊個比較得寵。

其實父母嘅偏心會對小朋友嘅將來造成極為深遠嘅影響。手足之間嘅年齡越相近,互相妒忌嘅問題就會越嚴重。MSNBC報導,研究負責人之一Karl Pillemer指出:「父母偏心會對子女造成長期負面心理影響,子女甚至喺成家立室後仍然難以走出陰影。」硏究指出,得寵嘅小朋友容易變得傲慢、自私,而覺得自己被忽視嘅小朋友會容易有焦慮、自卑同抑鬱傾向,甚至衍生出好多行為問題。專家建議,父母應該同每個小朋友都建立一個獨特嘅互動模式,
令佢哋覺得自己喺爸爸媽媽心目中係獨一無二。

點先可以成為唔偏心嘅父母?父母可以訓練子女互相學習同照顧,公平對待每個小朋友,避免過分偏袒任何一方,瞭解小朋友之間嘅個別差異,唔好拎小朋友嚟比較,亦都唔應該以成績區分好壞。父母們要記住,每個小朋友都總會有值得表揚嘅優點。


資料來源:今日新聞

相關文章