【大肚婆唔食得㗎!6種孕婦禁忌食物】

大肚婆唔食得㗎!6種孕婦禁忌食物

懷孕後,準媽媽們需要考慮嘅事情有好多,尤其係飲食方面,要確保胎兒可以攝取足夠營養,又要避免進食一啲對媽媽同寶寶有害嘅食物。今次就同大家盤點一下孕婦要注意嘅6種食物。

1) 未消毒的乳製品
乳製品中嘅鈣、蛋白質以及維他命 D 能夠促進寶寶嘅骨骼、牙齒、心臟以及神經系統嘅發育,但一定要避免生牛奶以及其他生嘅乳製品。食用之前,一定要睇清楚產品標籤,如果乳製品未經過巴氏或高溫消毒,就有可能含有李斯特菌,準媽媽一旦受感染有可能會導致流產。

2) 加工過的肉類
加工熟食,例如火腿、臘腸、腸仔,紅腸等,都有可能含有李斯特菌。李斯特菌生命力強,喺低溫下都可以生存,食物要加熱到 165℃ 先可以殺滅李斯特菌。對於一般健康嘅成年人嚟講,就算感染到呢種細菌都唔會有咩反應,但如果孕婦受感染就會有好大風險。

3) 半熟肉類
準媽媽們,係時候同半熟牛扒同壽司講拜拜。半熟肉類同海產容易滋生細菌以及其他病原微生物。孕婦食用嘅肉類,一定要加熱到 145 ℃ 以上先可以食用。

4) 半熟雞蛋
孕婦食用嘅雞蛋一定要係全熟,蛋白到蛋黃都要熟透。要注意嘅係,有啲蛋黃醬、沙拉醬等都含有半熟雞蛋成分,有可能滋生沙門氏菌,除非食物已經過「巴氏滅菌」,否則唔建議孕婦食用。另外,買雞蛋嘅時候要注意生產日期,雞蛋要放入雪櫃儲存。

5) 水銀含量高的魚
水銀有機會損害人的神經系統,孕婦要避免食用水銀含量高嘅魚類,例如吞拿魚、金目鯛、鯊魚、劍魚、旗魚、橘棘鯛和大王馬鮫魚等大型魚類。孕婦要注意選擇水銀含量低嘅魚類,例如烏頭、桂花魚、鯪魚、黃花魚、沙甸魚、大眼雞等。

6) 動物肝臟
動物肝臟含有豐富維他命 A,係胚胎生長所需嘅營養素,但攝入過量會增加胎兒畸形嘅風險。而實際上,大部分孕婦每天進食嘅水果、蔬菜、乳製品同雞蛋已經可以攝取足量嘅維他命 A,唔需要透過食用動物肝臟嚟補充,孕婦都係少食為妙。

資料來源:雪花新聞

相關文章