【當孩子還在你們身邊…請珍惜】

當子女仲係小朋友嘅時候總係纏住父母,有時父母會嫌佢哋煩。但係到小朋友長大,逐漸有自己嘅生活,連同佢哋見面嘅機會都少;畢業後出嚟工作,就連講電話嘅機會都唔多……所以當父母擁有小朋友嘅時候,應該懷住一顆感恩嘅心,要懂得珍惜同子女相處嘅每分每秒,當小朋友仲會煩你嘅時候,唔好動不動就發火,有時見到佢哋扭計哭鬧,都係一種幸福。

2歲囡囡返幼稚園喇,睇住佢小小嘅堅強背影,心中感到喜悅嘅同時又有少少心酸。分開咗半日,囡囡好開心咁跑過嚟攬住我,同我講:「媽咪,我好掛住你。」嗰一刻,我覺得擁有囡囡就等於擁有全世界。

6歲佢返小學喇,係一個值得紀念嘅時刻,囡囡嘅人生從此翻開咗新嘅一頁。原來,呢一日亦都係佢離開我嘅第一步。小朋友已經習慣同你分開一整天,而且佢仲好享受校園生活。甚至,有時會講:「媽咪,喺屋企好悶呀,冇人同我玩。」

12歲佢升中一喇,經常約同學出街,有自己嘅社交生活,開始唔再依賴我,甚至,鍾意同我對著幹。

15歲我想幫佢做少少嘢,佢會同我講:「媽咪,我自己嚟得喇。」呢句說話令我覺得好失落,囡囡係咪已經唔再需要我?

18歲佢考入大學,搬咗去大學宿舍,一星期先返嚟一次。每次佢返屋企,我都會為佢準備各種各樣佢鍾意嘅食物,塞到個雪櫃滿晒。但係佢一返到嚟換好衫,就出咗去同朋友聚會。從此,我最怕聽到嘅說話係:「媽咪,我唔返嚟食飯。」

21歲,大學畢業,開始出嚟做嘢,因為公司離屋企好遠,佢搬咗出去同男朋友住,一星期都返唔到嚟一次。

囡囡結婚喇,有一半時間分咗畀親家,同佢見面嘅時間更加少。

其實,當子女仲喺我哋身邊嘅時候,係幾咁幸福。但係有時我哋會抱怨:抱怨因為小朋友,犧牲咗好多;抱怨佢半夜扎醒,搞到你冇覺好瞓;抱怨佢無理取鬧,抱怨佢鍾意撒嬌,長唔大,抱怨佢成日病,令你心力交碎,抱怨為咗栽培佢,花費太多精力同金錢……但係,你有冇諗過,十幾年後,就算你想佢煩你,都再冇機會。子女對父母嘅依戀係有保存期限。

因為呢一點,我更加珍惜同小朋友相處嘅每一刻。無論遇到咩事,我都會心存感恩,無論小朋友帶俾我幾多困難、煩惱、甚至挫敗,令我失去幾多睡眠、時間、金錢、精力,我依然豁達,因為,呢啲都係上天嘅恩賜。佢喺我身邊嘅每一日,我都會令佢覺得幸福快樂。

我會同佢講:就算將來所有嘅路都唔通,都仲有一條路可以行,就係回家嘅路……

爸媽們,要珍惜同小朋友相處嘅時間,耐心陪伴孩子成長!

資料來源:壹讀

相關文章