【第二胎,生定唔生?】生第二胎的6個好處

到底應唔應該生第二胎?呢個問題你係唔係猶豫咗好耐?

生第二胎養唔養得起?以前「窮有窮養,貴有貴養」嘅觀念似乎已經不合時宜,經濟上嘅考慮總係會令人卻步。此外,生活質素會唔會有影響?老公唔幫手湊小朋友點算?壓力真係大到令人透唔到氣。但係,選擇生第二胎嘅依然大有人在。以下係幾個生第二胎嘅好處,媽媽們不防參考吓。

1) 學會照顧別人
當你生咗第二胎,哥哥姐姐會慢慢學識點樣照顧弟弟妹妹,佢會成為你嘅好幫手,喺你忙碌嘅時候,幫手餵奶、陪玩,等你可以有多啲時間休息。

2) 學會分享
小朋友嘅佔有慾好強,對於佢哋嚟講,同人分享係好困難,有咗弟弟妹妹後,佢會學習點樣去分享父母嘅愛、玩具等,從分享中學會愛、學會體諒,慢慢會明白分享帶畀佢嘅樂趣。

3) 懂得解決問題
兄弟姊妹嗌交係家常便飯,但嗌交都唔一定係壞事,可以學習點樣講出自己嘅想法去說服別人,挑戰自己嘅觀點,從而學識點樣去解決問題。

4) 團體合作
兩個人互相合作,總比一個人單打獨鬥好,而手足就係最好嘅合作夥伴,可以兩個人同心協力,完成一樣不可能嘅任務。

5) 一起渡過生活中的艱苦
當父母老咗、病咗,有手足可以互相支持,分擔照顧爸媽嘅辛苦。

6) 一起長大的幸福
友誼可能會隨時間而變淡,但家人無論時間幾長,總係會有一條線連繫住彼此。可以有一個手足一齊長大,參與生活中嘅每一個重要時刻,都係一種幸福。


資料來源:愛經驗

相關文章