【回南天必學】5招趕走衣物「噏味」

回南天又殺到!下星期開始天氣漸轉潮濕有霧,衣物要晾好耐先乾,容易滋生細菌令衣物出現陣陣「噏味」霉味。除咗用抽濕機或冷氣機降低房間濕度,不防參考以下5招衣物除臭大法。

方法(1):落少量白醋洗衣
開洗衣機加入150-200cc白醋一齊洗,弱酸性嘅白醋可以幫助抑壓細菌,有助去除衣物霉味。但要注意,動物皮毛類嘅衣物 (如羊毛冷衫) 就唔建議用呢個方法!因為白醋會傷害動物性蛋白質,令到衣服變得容易爛。

方法(2):熱風筒吹走臭味
如趕時間出門,可以用風筒「急救」,快速去除噏味。將衣服放入厚身膠袋入面,每次只可以放1至2件。將風筒嘅吹口放入膠袋(要注意唔好將散熱口都放埋入去),將袋口收緊,但唔好密封,用熱風邊吹邊搖晃膠袋入面嘅衣物。

方法(3):密封拉鏈袋放除臭劑
將衣服同一盒除臭劑放入密封拉鏈袋然後封緊袋口。呢個方法要「焗一陣」先可以吸走臭味,趕時間勿用!

方法(4):熨斗蒸氣除臭
用熨斗將有臭味嘅衣物燙一次,即可除去噏味。熨斗蒸氣可以殺滅引致臭味嘅細菌,可輕易消除霉味。

方法(5):倒V形晾衫法
將較長嘅衣物掛喺晾衫架兩邊,短嘅掛喺中間。V字形中間嘅空位有利上升氣流帶走水分。

資料來源:uBeauty,ON.CC

相關文章