踢走頭號致敏原:塵蟎 幫毛公仔除塵蟎 唔使用塵蟎吸塵機!

每位小朋友總有幾隻心愛嘅毛公仔陪伴左右,但奈何毛公仔係塵蟎最喜歡嘅棲息環境之一,而眾所周知,塵蟎往往會造成小朋友過敏,父母應該點取捨呢?

同事Megan嘅囡囡晴晴有一隻可愛嘅毛毛兔公仔,佢同兔兔幾乎形影不離,連瞓覺都要攬住,開心時會同兔兔一齊手舞足蹈,難過時會攬住兔兔喊,可想而知,呢隻毛毛兔公仔對晴晴嚟講有幾重要。雖然大家都知道毛公仔上面嘅塵蟎極有可能造成小朋友過敏,但大部分家長應該同Megan一樣,唔忍心睇住小朋友同佢嘅「best friend」分開。所以,當務之急就係要想辦法將毛公仔上面嘅塵蟎消滅。

高溫、潮濕嘅氣候特別適合塵蟎繁殖,而塵蟎就係引發過敏嘅頭號殺手。由於塵蟎抵受唔到太高或者太低嘅溫度,建議屬於適合烘乾嘅材質或者物品,可以用高溫方式來殺死塵蟎,然後再按照一般程序清洗;而唔耐熱、無法烘乾嘅材質,就用低溫冷藏法來凍死塵蟎。

由於毛公仔抵受唔到高溫烘乾,所以可以選擇用低溫方式將塵蟎凍死。做法係將毛公仔擺入雪櫃冰格冷藏一日,之後再洗淨晾乾。大部分家用雪櫃一定會儲存各式各樣嘅食物,為咗避免沾染異味或者被油脂整污糟,建議將毛公仔放入密實袋後再冷藏。除咗公仔之外,枕頭仔、衣物都可以用呢個方法來除塵蟎。

 

資料來源:低敏共生,小兒過敏自然消失!

相關文章