小朋友唔肯食蔬果 飲蔬果汁就得? 蔬果變蔬果汁會令營養流失!

唔少媽媽都有同一個疑問:「小朋友唔鍾意食水果,唯有榨成汁畀佢飲,但咁做會唔會破壞膳食纖維,冇咁健康呢?」其實果汁嘅維他命C同埋膳食纖維都比水果低,而且飽腹感亦較低,糖分亦都較高。

流失維他命C

榨汁後,蔬菜水果入面嘅維他命、類黃酮、花青素等抗氧化成分都會流失。當蔬果係完整嘅時候,抗壞血酸氧化酶同埋維他命C係分開嘅,一旦榨成汁,高速旋轉嘅刀片會將蔬果入面嘅細胞全部破壞,令抗壞血酸氧化酶同埋維他命C混埋一齊,兩者發生氧化作用,令維他命C受到破壞。

流失膳食纖維

榨汁後,非水溶性物質,例如鈣、膳食纖維等都會被遺留喺蔬果嘅渣入面,因此蔬果汁嘅膳食纖維含量會比蔬果低。由於流失咗好多人體必需嘅膳食纖維,飲蔬果汁不單止唔可以幫助消化,仲有可能引起便秘。

好多市面上嘅現成蔬果汁,喺製作過程中都會對蔬果進行熱燙處理,即係將水果蔬菜放入滾水中稍為燙一下,將氧化酶「殺滅」,同埋令組織軟身啲先榨成汁。咁做不單止可以減少維他命流失,仲可以令榨出來嘅汁顏色鮮艷啲。特別係一啲冇酸味嘅蔬菜,例如蘿蔔、青菜、芹菜、粟米,必須燙過再榨汁。另外,有啲商家喺榨汁嘅時候會加入類似檸檬等較酸嘅水果,彌補返被破壞嘅維他命C。

製作蔬果汁注意事項

自己榨汁嘅話,最好選擇新鮮當造嘅蔬果。冷凍嘅蔬果由於放置時間長,維他命嘅含量會逐漸減少。另外,榨果汁時多啲配搭蔬菜,唔好加糖、蜂蜜等添加糖,可以減少蔬果汁嘅含糖量。此外,榨汁後要儘快飲完,因為新鮮蔬果汁放置時間過長會被光線同埋溫度破壞維他命嘅效力,營養價值會降低,同埋容易滋生細菌。

 

資料來源:Zi 字媒體

相關文章