7成孕婦有尿滲經驗 如何預防產後尿滲?

大約七成孕婦有尿滲嘅經驗。懷孕期間,變大咗嘅子宮會壓迫膀胱或尿道,而導致不自覺尿滲。另外,連結尿道同埋陰道嘅骨盆底喺生產時會受到損傷,導致產後容易尿滲。如果呢個時候唔好好預防會容易引起更年期尿滲,所以要好好鍛鍊骨盆底。

產前注意事項

懷孕時膀胱嘅收縮力會減弱,排尿時容易無意識咁喺腹部用力,一旦養成呢種習慣就會造成尿滲。應該累積尿液直到膀胱滿咗再排尿,減少使用腹肌嘅力量。

產後注意事項

鬆弛咗嘅骨盆底大概需要1~2個月時間恢復,期間要盡量瞓低休息,有助恢復,等到會陰唔痛,就可以開始做訓練運動,鍛鍊骨盆底。生產後嘅一個月要用束腹帶束緊個肚,要注意腹肌運動,如果壓迫到骨盆底,都會造成尿滲。

**做產前產後運動之前要先諮詢醫生。


骨盆底負擔程度測試

生活習慣、體質、體型同埋生產時嘅狀態,都有可以對骨盆底造成負擔。有以下情況嘅人就要特別注意預防尿滲。


習慣、體質、體型

- 因為便祕,需要用力排便

- 因為工作等因素經常要拎重嘢

- 需要長時間站立嘅工作

- 經常打噴嚏或者咳嗽

- 身材高同埋肥胖


生產

- 生產經驗3次以上

- 35歲以上第一次生產(剖腹產除外)

- 子宮頸口開咗到生產花咗5小時以上

- 產下3.5kg以上嘅嬰兒

- 生產一星期後子宮依然下垂


預防、改善尿滲訓練

鍛鍊骨盆底運動嘅感覺就好似忍住放屁、憋尿一樣,收緊陰道到肛門附近,令肛門口嘅肌肉收緊就可以。

腰、腹部、腳唔好用力。

1. 平瞓,雙腳打開到同肩膊一樣寬,彎曲膝蓋,維持呢個姿勢收緊骨盆底12∼15秒左右。

2. 休息50秒後,再度收緊骨盆底。重複步驟(1)+(2)十次。

 

資料來源:華人健康網

相關文章