海鹽岩鹽天然健康?長期食用「無碘鹽」小心影響幼兒智力!

而家市面上有好多強調天然嘅進口海鹽、岩鹽,同埋玫瑰鹽,如果有留意罐身嘅成份標籤,就會發現幾乎全部都缺少「碘」,有專家擔心如果長期食用完全冇碘嘅鹽,有可能會造成碘質攝取不足,甚至出現「大頸泡」,或者影響幼兒智力。

點解人體需要攝取碘呢?碘係甲狀腺素嘅主要成份,缺碘嘅時候甲狀腺會變得腫大,稱為「甲狀腺腫」,俗稱「大頸泡」。嚴重缺碘會造成甲狀腺素分泌不足、影響新陳代謝,甚至令幼童發育不良同埋智商低,稱為「呆小症」,嚴重仲會致命。如果孕婦缺碘就會影響胎兒發育,甚至導致胎死腹中同埋流產。

海產類食物嘅碘含量豐富,當中海帶、海藻等食物嘅碘含量最高,建議每日應攝取150微克(0.15毫克)嘅碘;孕婦每日建議攝取嘅碘要比健康成人多25微克(即係每日175微克) 。

如果人體攝取過量嘅碘,都會對健康有影響,出現甲狀腺機能亢進等問題,因新陳代謝太快,造成手震、心悸、失眠、腹瀉、緊張、體重減輕等症狀。

 

資料來源:華人健康網

相關文章