「咬爆匙羹」隨時割損喉嚨!醫生建議5歲以下兒童唔好用塑膠餐具

千祈唔好睇小塑膠匙羹嘅殺傷力!醫生奉勸五歲以下嘅小朋友去餐廳用餐嘅時候,家長要注意唔好畀佢哋咬塑膠匙羹,一唔留意咬斷匙羹柄、羹面,塑膠碎片就有機會割損喉嚨,嚴重嘅話有可能令食道潰瘍、變狹窄,導致吞嚥困難。

醫生指出,五歲以下嘅小朋友因為好奇心重,喺屋企常見嘅硬幣、玩具、首飾、磁石或者電池等等都有被誤食嘅風險。就算出街食飯家長都要特別留意,因為小朋友食飯專注力不足、鍾意一邊玩一邊食,一旦唔小心將匙羹咬爛,就會連塑膠碎片都一齊食埋落肚。

如果碎片大細係2.5 cm以下、碎片較鈍,危險性就會較低,基本上二至四星期就可以排出體外。家長需要觀察小朋友有冇出現劇烈肚痛、持續嘔吐、精神差食慾下降等等,如果出現異常症狀,就要即刻帶小朋友去急症室。

如果碎片長度達2.5cm以上、斷裂面銳利,就會容易卡喺食道壁,如果唔及時取出,就會造成食道潰瘍、變狹窄,甚至出現吞嚥困難。

醫生亦提醒由於塑膠碎片照X光都睇唔清楚,所以要用電腦斷層掃描檢查,需要接受較高嘅放射線而且唔一定可以清楚分辨異物嘅位置,「胃鏡」係可以最清楚檢查消化道嘅工具,但因為小朋友都比較好動,所以需要接受全身麻醉先至可以係安全情況下取出異物。建議家長帶五歲以下嘅小朋友出街食飯嘅時候,最好不要使用結構脆弱嘅用完即棄塑膠餐具,避免不必要嘅傷害同埋入侵性治療。

 

資料來源:ETtoday

相關文章