2歲半女童近視900度! 醫生:3歲前唔好接觸電子產品

內地有一位兩歲半女童因為長期使用電話導致雙眼近視達到900度。醫生就話,女童嘅近視仲會隨著年齡變得越嚟越深。

綜合內地傳媒報導,揚州市婦幼保健院兒童眼耳鼻喉科科長劉琍醫生指出,佢日前接診咗一位兩歲半嘅小朋友小美(化名),小美嘅爸爸媽媽就話,囡囡成日習慣性皺眉頭、瞇眼,佢哋原本以為係囡囡嘅壞習慣所以就冇為意,但呢個症狀維持咗足足一年,所以就帶囡囡求診。

經過檢查後,發現小美雙眼近視達到900度。劉琍表示,小美嘅近視仲會隨著年齡增長而加深。所以佢提醒大家,三歲以下嘅兒童唔好接觸電話、平板電腦等等電子產品、三至六歲嘅小朋友每日使用電子產品嘅時間唔應該超過30分鐘,最好控制喺15至20分鐘內。


醫生向家長透露,兒童近視後會出現6個早期症狀:

1. 鐘意瞇眼睇嘢:長期瞇眼會導致眼部肌肉疲勞,近視度數加深會更快。

2. 經常皺眉:皺眉可能造成眼瞼同埋眼外肌變化,改變眼球形態同埋角膜,從而希望睇得清楚啲。

3. 經常捽眼:如果發現子女成日捽眼,可能表示佢哋視力下降。

4. 經常眨眼:近視嘅小朋友因為睇嘢唔清楚,眼睛都好容易攰所以成日捽眼,間竭導致慢性結膜炎同埋角膜受損,如果眼部唔舒服嘅話,小朋友就可能會經常眨眼。

5. 好近睇嘢:好近睇嘢同睇電視嘅時候會不自覺咁向前行,咁樣都代表佢哋嘅視力變差。

6. 經常歪頭或斜眼睇嘢:近視嘅小朋友好鍾意歪頭或者斜眼睇嘢,因為咁樣可以減少光線散射,消除一部分像差(Optical aberration),睇嘢就可以清楚啲。

 

資料來源:ETtoday

相關文章