小朋友夜瞓有咩影響?除咗長唔高,仲會影響智力!

小朋友缺乏睡眠的影響

1. 影響身高

晚上10點到凌晨1點係生長激素分泌最旺盛嘅時候,呢段時間小朋友應該處於深睡眠狀態,如果錯過咗呢個時間就會影響小朋友生長。由淺層睡眠去到深層睡眠需要大概50分鐘,所以由晚上9點開始就應該比小朋友進入睡眠狀態。

2. 傷害心臟

大家都認為捱夜最傷嘅係肝臟。其實對小朋友來講,心臟先係傷最嚴重。因為睡眠不足會令佢哋情緒更加亢奮,如果長時間處於呢個狀態,就會增加小朋友患心臟血管疾病嘅危機,到咗中年,就會比同齡人士更加容易患上呢類疾病。

3. 導致性早熟

年幼嘅小朋友身心嘅抗壓能力有限,日頭精神得唔到放鬆,就會分泌出壓力荷爾蒙;夜晚唔早啲瞓覺就會令壓力荷爾蒙繼續分泌,唔單止影響生長激素嘅分泌,仲會令性荷爾蒙失調,出現早熟現象。

4. 影響智力

瞓覺時段唔同,對身體都有唔同意義。上半晚進入睡眠狀態可以有助造血功能完善;下半晚睡眠有助身體器官自我調節;日頭瞓覺就只會回復體力。

所以,早瞓嘅小朋友轉數都比較快,更加聰明。夜瞓嘅小朋友就會表現得脾氣暴躁、好動、注意力唔集中等等,對將來學習有好大影響。


點樣幫小朋友改善夜瞓習慣?

1. 規定睡覺時間

家長要規定小朋友上床瞓覺嘅時間,臨瞓前半小時可以講故事、聽音樂。一方面可以令小朋友平靜落嚟準備進入睡眠狀態,另一方面可以比小朋友一個儀式感,令佢哋知道只要做咗某件事,就意味住係時候瞓覺喇。

2. 家長要以身作則

好多小朋友夜瞓係因為家長自己都有夜瞓嘅習慣。自己做唔到嘅事,都好難要求小朋友做到。所以最好調整一下自己嘅作息習慣,以身作則,小朋友會更樂於改變。

 

資料來源:壹讀

相關文章