【BB切勿飲太多水 小心「水中毒」!】

BB切勿飲太多水   小心「水中毒」!

一般人嘅觀念都係飲得多水就健康,但對於1歲以下嘅寶寶來講,飲太多水反而會造成腎臟嘅負擔,因為嬰兒嘅腎臟仲未發育成熟。

兒科醫生表示,1歲以下嘅嬰兒如果一下子飲太多水,腎臟會嚟唔切將水排出,多餘嘅水分會令血液入面嘅鈉離子濃度降低,令細胞外面嘅滲透壓變得比細胞裡面低,於是水分就會往細胞裡面移動以達到平衡,造成細胞腫脹,甚至腦水腫,俗稱「水中毒」。水中毒嘅症狀包括極度嗜睡、面無表情、感覺遲鈍、精神錯亂、過度激動、痙孿等,嚴重者甚至會死亡。

咁到底嬰兒飲幾多水先會水中毒呢?其實冇一定嘅標準,只能夠大約估算出一個安全範圍。1歲前,除咗攝取奶類同副食品之外,每公斤體重額外攝取30c.c.嘅水,分幾次飲用,原則上係安全。未滿4個月大嘅嬰兒唔需要另外補充水分,因為母乳或者配方奶有87%以上都係水分,如果額外再飲水反而會降低奶量,減少營養攝取,甚至造成水中毒。由開始加固到1歲之間,透過副食品補充水分係最好嘅方法,呢個時候如果寶寶唔鍾意飲水,都係身體嘅正常反應,唔需要強迫寶寶飲水。

腎臟嘅功能幾時先會發育成熟呢?一般而言,腎臟要到1歲後先算初步成熟。但要注意,成人有將尿液濃縮嘅能力,可以從尿液中回收水分再利用,而嬰兒就要到1歲半先有同等嘅能力。如果嬰兒因為流汗、嘔吐、腹瀉而造成水分大量流失,就無法從尿液中回收水分再利用,呢個時候不但要補充水分,亦都要補充電解質,以免造成脫水。


資料來源:大紀元

相關文章