《武漢肺炎》全民抗疫瘋搶口罩 台灣抗SARS專家:大家搞錯重點

喺台灣參與過抗SARS(嚴重急性呼吸系統綜合症)嘅研究員何美鄉表示,台灣目前仲未出現社區感染,根本未到要戴口罩嘅時候,但不單止全民瘋狂搶口罩,街上幾乎人人都戴晒口罩。


好多人認為戴口罩就可以預防武漢肺炎,其實「大家都搞錯重點」,何美鄉指出,一個人喺街上同一名患者擦肩而過,戴咗口罩的確可以預防嗰一瞬間被飛沫傳染嘅機會,但如果呢啲飛沫落咗喺物件表面,可以生存長達5日,任何人摸到後捽眼捽鼻就有可能被感染,所以勤洗手比戴口罩更重要。

曾帶領台灣抗SARS嘅感染防疫專家蘇益仁表示,目前新型冠狀病毒仲未喺台灣出現社區感染,明明冇戴口罩嘅需要,但出現全民瘋搶口罩,人人戴口罩嘅情形,代表大多數市民對疫情反應過激,擔心自己身邊會出現漏網之魚。

蘇益仁指出,呢種恐慌情緒不單止發生喺台灣,全球都一樣,擔心再咁樣落去,台灣未被武漢肺炎打敗,就先被國內嘅恐慌情緒打敗,各界每日都喺度爭論點樣分配口罩,口罩問題恐演變成政治口水戰。


資料來源:中央社

相關文章