10歲偷渡男童藏身飛機起落架 10公里高空-50°C缺氧凍死

法國巴黎戴高樂機場日前發生咗一宗偷渡客死亡事件,一架由象牙海岸起飛嘅客機1月8日抵達巴黎時,機場職員喺起落架發現一名約10歲嘅兒童屍體,當局初步懷疑男童係因為想偷渡而匿埋喺起落架,但由於飛機喺高空時底盤系統唔會加熱同埋加壓,而導致男童被凍死或者窒息,詳細案情仍有待調查。

根據外國傳媒報導,呢名約10歲大嘅非裔男童1月7日由象牙海岸機場偷渡,爬入準備起飛嘅波音777客機起落架上面匿埋。第二日當客機抵達巴黎戴高樂機場時,機場職員喺起落架入面發現咗男童嘅屍體,相信佢已經死亡多時。

調查人員指出,由於飛機喺高空飛行嘅時候底盤唔會加熱同埋加壓,當飛機飛到9至10公里時,溫度可能會降到攝氏零下50度,空氣亦會變得稀薄,因此初步懷疑男童嘅死因係窒息或者凍死。

法國航空喺1月8日亦都喺社交網站證實咗呢個消息,但聲明中並冇說明死者身分。另外,根據《美聯社》報導,一名法國官員透露,死者係一名來自非洲嘅年輕人,警方目前正在進一步調查事件。


資料來源:ETtoday

相關文章