媽媽側躺餵人奶瞓著咗 BB窒息吐血亡

新加坡一名媽媽側躺餵母乳嘅時候唔小心瞓著咗,瞓醒發現15日大嘅兒子冇咗知覺,包被上面仲有嘔吐物,佢立即將bb送院,醫院宣告不治死亡,死因係意外窒息,並冇可疑,婦幼醫院護士長表示,一般都唔建議媽媽側躺餵人奶。

根據新加坡《海峽時報》報導,事件發生喺去年9月1日,媽媽半夜1點30分側躺餵母乳,餵餵吓瞓著咗,大約1個半小時後被丈夫去廁所嘅聲音嘈醒,感覺到手掌濕濕哋,於是叫丈夫開燈,發現小朋友郁都唔郁,旁邊仲有嘔吐物同埋血跡。

爸爸立即將bb送往醫院,但送院兩個小時後終告不治,經驗屍後證實,bb死因並冇可疑,係意外窒息。

死者出世嘅「KK婦幼醫院」資深護士長張寶玲(譯音,Teo Puay Ling)指出,一般來講有兩種正確餵母乳嘅姿勢,一種叫做「足球抱」(football hold),媽媽扶住bb嘅頭靠向乳房,兩人基本上係面對面,另一種稱為「改良搖籃抱」(modified cradle hold),媽媽用成隻手臂撐著寶寶身體,手掌撐著頭,bb同媽媽基本上呈現垂直角度。

張寶玲解釋,一般唔鼓勵媽媽瞓喺度餵奶,因為過程中會產生令媽媽放鬆嘅『催產激素』,佢會好易瞓著,bb會有窒息風險。

 

資料來源:ETtoday

相關文章