18歲媽餵初生女兒飲清潔劑 女嬰被母由3樓掉落街慘死

泰國暖武里府日前一名18歲媽媽意外懷孕分娩後唔知點算好,竟然餵啱啱出世嘅囡囡飲清潔劑,仲將佢放入膠袋由3樓掉落街,警方到達現場時,發現BB仲未死亡,但係生命跡象非常微弱,之後將18歲媽媽同埋23歲男子一齊拘捕。

根據Sanook報導,巴革縣(Pak Kret)警方上月23日下午4時接到報案,一名初生BB被放到一個黑色膠袋,當係垃圾掉係大廈嘅垃圾堆,根據CCTV片段可見,裝住BB女嘅膠袋竟然係由大廈某一層掉下,墜落過程中受到撞擊,然後跌落垃圾堆,由於警方到達時BB女仲未死亡,所以判斷疑凶所在位置唔會超過4樓。

警方隨即喺事發嘅大廈進行搜尋,調查到3樓嘅時候發現樓層嘅其中一個單位打掃得特別乾淨,好遠都聞到濃烈嘅消毒藥水味,結果喺屋內發現一張有血跡嘅紙巾、一件有血嘅衣服,浴室仲有血跡。

住喺3樓嘅18歲女大學生Om,喺警方要求下去到醫院進行檢查,發現佢下體有大約2cm傷口、子宮充滿血液,進行DNA對比證實佢就係BB嘅媽媽。佢承認,生咗BB之後唔知點算,餵佢飲清潔液之後再掉落街,希望可以殺死佢。BB女最後都傷重不治,目前已經送去進行驗屍查明死因,Om同埋佢男朋友都被控故意殺死他人罪而被拘捕。

 

資料來源:ETtoday

相關文章