11歲男孩食朱古力敏感喪命 父事後發現朱古力含「奶粉」崩潰!

英國11歲男孩Raffi Pownall對乳製品過敏,父親Thomas喺6月8號攞咗4塊朱古力俾佢食,而佢當時誤以為朱古力係不含乳製品,但係估唔到男孩食完之後就出現嘔吐、呼吸困難等等情況,緊急送院最終不治。Thomas再仔細睇包裝先發現原來朱古力嘅成份含有奶粉,事後都對自己粗心大意害死兒子感到相當後悔。

根據英國《太陽報》22日報導, Thomas Pownall上個月8號將4塊朱古力放喺玻璃碗度,再拎畀兒子食,估唔到朱古力吞落肚冇耐,兒子就出現嘔吐、呼吸困難等等嘅過敏反應,佢即刻打電話叫救護車,再攞出吸入器搶救,但係兒子送到醫院後亦喺同日嘅傍晚5:43宣告不治。

Thomas提到,兒子對乳製品敏感,佢已經確認過朱古力不含麩質、乳製品先拎畀佢食,事件發生後佢即刻攞起包裝再睇,呢個時候先發現原來含有奶粉。

負責呢件案件嘅驗屍官Richard Taylor證實,Raffi過敏死亡屬於意外,「佢爸爸已經盡咗力救佢。我覺得佢只係唔小心食咗一塊含有奶粉嘅朱古力,所以呢一單案件屬於意外死亡。」

Thomas事後因為自己粗心大意而感到相當後悔,但佢真係以為朱古力係冇乳製品,而唔係故意餵食,事件發生後亦想盡辦法急救,最後獲判不起訴,但無論佢有幾後悔,都換唔返兒子寶貴嘅性命。

 

資料來源:ETtoday

相關文章