懷孕6個月模特兒按摩致流產昏迷半年後離世

泰國一位25歲模特兒兼舞者Wirawan Kedkesri喺今年一月大住肚去到清邁一間按摩店做泰式按摩,點知按到一半佢突然昏迷,緊急送院後肚入面6個月嘅BB都保唔住,而佢本人就持續昏迷,半年後不幸過身。

綜合外國傳媒報導,Wirawan今年1月11日,喺懷孕六個月期間去到清邁一間按摩店按摩,服務佢嘅係一位女按摩師,亦有告知死者因為係孕婦所以唔適合按摩身體,所以Wirawan接受咗一個鐘嘅腳部按摩,主要集中喺腳同埋小腿。

之後按摩師準備幫Wirawan按摩肩膊所以先離開房間,點知返嚟就發現佢抽搐而且失去知覺瞓咗係床上,工作人員即刻將佢送到醫院,但係佢之後出現中風同埋心臟驟停等等病徵,最後因為冇咗呼吸,就連肚入面嘅BB都不幸離世,而佢就一直處於昏迷狀態。

醫生診斷出Wirawan患有肺栓塞同埋缺血性中風,大腦動脈亦有阻塞嘅情況,需要靠儀器維持生命,呈現腦死亡狀態,持續昏迷半年。家人喺19日決定拔除呼吸儀器,Wirawan喺當日下午2:30安詳離世,佢嘅五歲兒子亦有陪伴喺媽媽身邊。

佢叔叔Chaiwat Khamya提到,因為姪女流產之後過咗半年都冇任何蘇醒跡象,「對我哋來講係非常艱難嘅決定,但係佢而家已經獲得平靜」。事發之後,按摩店拒絕負責,受害人爸爸提到「按摩店老闆話唔會做出任何賠償,我囡囡係一個單親媽媽,希望有人負責」。

清邁蒲屏宮區警方指出,佢哋原先已經對女按摩師提出起訴,罪名係業務過失和傷害等,店舖嘅工作人員知道Wirawan懷孕就唔應該幫佢按摩。而家受害人不幸死亡,警方會收集醫療證據,再提出過失致死等等控訴,並且調查按摩店老闆。

 

資料來源:ETtoday

相關文章