19歲嫩媽早產10週生「無皮BB」 全身血管清晰可見似「生肉」!

英國日前出現一個早產10週嘅BB,當時佢嘅皮膚仲未完全長出,成個人睇起嚟好似一塊生肉,非常脆弱,稍有不慎就有可能感染到病菌而死亡,就連醫生都叫佢父母做好心理準備,但最後BB都捱過咗半年嘅關鍵期,堅強咁生存落去。

根據《每日郵報》報導,來自沃里克郡嘅早產嬰兒Kaiden Jack Shattock,舊年11月24日喺諾丁漢市醫院出世,當時1.1公斤嘅佢全身除咗面部之外,身體只有2%有皮膚覆蓋。媽媽Jessica Kibbler同爸爸Jake Shattock形容,當時護士帶佢哋去見囝囝,見到佢身體紅卜卜,肌肉入面嘅血管睇得好清楚,望落就好似一塊生肉。

Jessica回憶當時情況,「當時我同老公都只係19歲嘅新手爸媽,冇照顧小朋友嘅經驗,我哋完全唔知點算好,我地兩個一齊喊嘅時候,就連護士見到都忍唔住走出病房一齊喊。」Kaiden出世頭10日,Jessica同Jake都被禁止抱自己嘅親生骨肉,令佢哋更加痛苦。

由於缺乏皮膚同早產,Kaiden必須同先天性疱疹、壞死性小腸結腸炎、敗血症、皮膚溶解、支氣管炎等疾病搏鬥,而且需要靠機器維生,醫生曾經兩度表示,Kaiden嘅存活率非常低,Jessica同Jake要隨時做好心理準備。

幸好Kaiden嘅皮膚喺6週大後慢慢長出,但因為皮膚太脆弱,就連著衫都有危險。半年之後,Kaiden終於度過難關,而家已經可以同父母一齊返屋企,體重亦達到4.28公斤,但係呢場仗戰爭仍然未完結,預計佢出年要進行最少四次手術。

 

資料來源:ETtoday

相關文章