狠心爸3拳打爆囝囝頭骨致死 只因2個月大男嬰嘈住佢打機!

南韓先前發生咗一單殺子悲劇,一位年近30歲嘅爸爸沉迷打機,囝囝出世之後,打機時經常被BB打斷,後來囝囝一扭計佢就會用毛巾將佢綁住。有一日佢竟然情緒失控,出拳打死囝囝,手法兇殘,呢位爸爸已經被警方拘留。事後調查發現,呢單悲劇發生嘅時候,男嬰嘅媽媽正在瞓緊覺。

蔚山地方檢察廳13號指出,呢位29歲男子同老婆平日會全日留喺屋企,用六部電腦不停打機獲取裝備,然後喺網上出售裝備維生。呢位男子爭人周身債,因為欠債壓力,又要照顧BB,搞到無法專心打機拎裝備,收入減少就將個仔當成出氣袋咁發洩。

舊年12月到今年1月期間,每次BB因為肚餓或者其他原因哭鬧,呢位男子就會拎兩條毛巾出來,將囝囝嘅上半身同下半身捆綁着。根據警方講法,呢位男子每日都用呢個手法虐待兒子長達15小時,持續咗一個月左右;而男嬰嘅媽媽明明親眼睇見老公嘅行為,但竟然選擇袖手旁觀。直到BB死後先發現肋骨有多處骨折。

1月18日凌晨2點左右,男子好專心咁玩緊手機遊戲,原本瞓緊覺嘅囝囝突然醒咗之後開始大喊,火遮眼之下用拳頭狂打佢嘅頭部三下,男嬰事後被緊急送到醫院,但因為頭骨骨折同埋腦出血最後宣告不治。

男子最初喺警方盤問嘅時候話「跌咗個仔落地下」,之後喺檢方調查過程入面先坦白講出真相,目前佢因為虐待兒童致死同埋虐待兒童罪名被起訴。檢方指出「驗屍嘅時候發現BB身上有比毛巾捆綁造成嘅肋骨骨折同埋全身有瘀傷。

 

資料來源:ETtoday

相關文章