小朋友喺餐廳吵鬧要加收「15%尖叫費」!餐廳出Po惹爭議 

出街食飯嘅時候,如果隔離枱嘅小朋友大吵大鬧的確令人好困擾,愛爾蘭就有間Café為咗保持鋪頭安靜,就喺網上發出公告,佢哋將會對帶着嘈吵小朋友嘅客人收多15%「尖叫費」,嘈吵嘅小朋友越多,收費都會越高,如果超過四位小朋友同時吵鬧,Café仲會直接請成家人離開。文章一出,即刻引來好多網友留言表示支持,不過亦有好多人反對,認為應該抵制呢間餐廳。

白麋咖啡館(The White Moose Café)位於愛爾蘭首都都柏林,呢間店嘅店主保羅(Paul Stenson)日前喺社交平台表示,「為咗維護員工同埋顧客嘅權益,嚟緊將會對尖叫嘅小朋友收取額外15%費用」,而且每增加一位小朋友,就會再收多10%尖叫費,不過並唔係冇上限,即使顧客好大手筆咁畀晒小朋友嘅尖叫費,如果攜帶超過四位尖叫嘅小朋友,就成家人都要離開白麋咖啡館。

短短一日已經吸引到5600個讚好,超過400人分享,亦引起好多網民留言,「係我睇過最好嘅公告之一」、「支持!每間鋪頭都應該收取尖叫費」、「聽日就去食飯順便睇吓要比錢嘅父母哈哈哈」、「不能同意更多」、「表現好嘅小朋友有冇折扣」、「你可唔可以順便同航空公司講要一樣嘅服務」、「作為家長超級支持呢個收費」。

但亦都有好多人認為小朋友好難控制,咁嘅收費實屬苛刻,「按照呢個節奏,你會好快冇晒客人」、「無聊」、「想俾人投訴?」、「有啲小朋友可能本身有病先至會咁,例如自閉症,畀啲同情心好唔好」、「好低裝嘅宣傳手法」、「可恥,呢間鋪頭係咪想俾人抵制」。

但店主Paul就認為,「身為家長應該看管自己嘅小朋友,唔好俾佢影響到其他人」,仲直接回應唔贊成嘅網民「你唔係我哋想服務嘅客人」。

 

資料來源:ETtoday

相關文章