父殺母後吞槍自殺! 4歲女童伴屍3日 獨自照顧2個月大男嬰

美國洛杉磯查茨沃斯(Chatsworth )發生咗一單家庭悲劇,疑似爸爸開槍殺死媽媽之後再開槍自殺,留低一對年幼子女。警方到場時,四歲嘅姐姐獨自照顧兩個月大嘅弟弟,喺冇大人照顧嘅情況下,安然渡過咗三日,兩姊弟隨後送院治療,警方仲稱讚呢位姐姐係英雄。

洛杉磯警方喺當地時間21號上午七點幾接獲報案,小朋友嘅爺爺表示好擔心兒子嘅狀況,因為兒子長期受精神病折磨,有焦慮、抑鬱嘅問題,而且已經好多日冇聯絡。警員前往兒子一家嘅住所敲門但冇人應門,喺附近檢查幾分鐘冇發現異樣。

隨後,警員喺附近向鄰居打聽消息,一位鄰居就話,前幾日聽到嗰間屋入面傳出爭執嘅聲音同埋兩聲巨響,但證實唔到有咩意外發生。到咗當日下午,爺爺仲係覺得好擔心,聯絡咗呢間屋嘅經紀同埋幾個鄰居一齊入屋,入屋先發現屋主夫妻已經死咗喺睡房,之後報警。

死者分別係38歲日籍媽媽Mihoko Koike Parsa以及46歲爸爸David Parsa。另外,屋入面仲有一名兩個月大嘅男嬰瞓咗喺BB床,照顧佢嘅係只有四歲嘅姐姐,兩個獨自困咗喺屋入邊三日,有脫水同飢餓嘅現象,但就冇受傷。

警方估計,應該係老公首先開槍殺死老婆,之後再開槍自殺,但到暫時未清楚原因。警方冇表示小朋友係咪有目擊犯案過程。

目前兩位小朋友已經送院治療,而且無大礙,之後會被安置喺社福機構等待處理。洛杉磯警隊隊長Maureen Ryan稱讚小女孩,「我哋嘅小天使成功保住自己同細佬嘅性命,喺我眼中佢係一個英雄」。區內嘅居民都發起籌款,幫助呢對失去雙親嘅小姊弟,目前已經籌得超過2000美金。

 

資料來源:ETtoday

相關文章