【法國離奇出現大量無臂嬰兒 政府宣佈全國調查】

據《文滙報》報道,法國全國最少3個省喺過去15年間,先後錄得最少25宗情況相似嘅畸形嬰兒個案,呢啲嬰兒大多天生冇手臂或手臂發育不良,原因至今仍未查明,引起公眾恐慌。法國公共衛生局於10月31日宣佈展開全國調查,研究畸形嬰兒是否與食物安全、水源或空氣污染等環境性因素有關,預料將於明年1月公開初步調查結果,並於6月發表最終調查報告。

畸形嬰兒個案頻生令當局響起警號,衛生部長比贊強調當中可能涉及環境因素,透過懷孕婦女飲食同呼吸影響嬰兒。佢指出,調查將由公共衛生、食物、環境等部門聯合進行,透露調查人員將會了解畸形嬰兒嘅母親有冇存在共通點,同埋徹查有關家庭最少過去10年嘅病史。

1950年至1960年代間,全球有好多孕婦因為服食止孕吐藥「沙利度胺」(Thalidomide),導致大約一萬名畸形嬰兒出生,結果「沙利度胺」被禁用。環境專家估計,今次情況可能同郊區經常使用殺蟲劑等化學藥物有關,不過暫時未有證據顯示兩者有直接關係,亦有人認為係同遺傳基因有關。法國醫院數據顯示,當地每年約有150宗畸形嬰兒個案,平均每1萬人就有1.7名畸形嬰兒。

 

資料來源:聯合新聞網

相關文章