【2個月大BB被一條頭髮勒住4隻腳趾險截肢】

一位來自英國德雲郡嘅26歲媽媽阿普敦(Alex Upton),日前發現10週大嘅囝囝Ezra突然大哭大鬧,仔細檢查發現寶寶左腳上面有一條勒得好緊嘅頭髮,其中一隻腳趾已經明顯紅腫,幸好阿普頓及時將囝囝送到醫院就診,先可以避過截肢嘅命運。由於嬰兒嘅腳趾、手指比較幼,一旦被頭髮勒住就有可能引發「頭髮止血帶綜合症」(Hair Tourniquet Syndrome),需要截肢保命。

阿普敦提到,事發當日清晨佢被囝囝嘅喊聲嘈醒,原本以為係寶寶肚餓想飲奶,但餵奶時Ezra又一啖都唔肯飲,佢就懷疑可能係佢身體唔舒服,於是仔細檢查,竟然喺寶寶嘅左腳發現一條纏住4隻腳趾嘅頭髮,而且勒得好緊導致血液唔流通,其中一隻腳趾已經變得又紅又腫。阿普敦嘗試用眉鉗將頭髮解開,結果花咗15分鐘先成功,然後立即送寶寶到醫院就診。

當時嘅緊張心情,阿普頓而家諗返起都仲猶有餘悸,幸好一切發現得及時,再遲少少就可能要截肢,經過治療後已經逐漸恢復正常。阿普頓強調,如果係事發前一晚沖涼之後就開始勒住,估計腳趾已經被頭髮勒住12~14小時,「所以由而家開始我一定會更仔細檢查清楚寶寶要著嘅衣服有冇殘留頭髮,原來呢啲意外真係好容易發生,只要一個唔留神就可能中招。」

喺學校擔任助教嘅阿普敦將自己嘅經歷同其他家長分享,希望大家小心,「頭髮好容易會卡住喺洗衣機,所以幫寶寶穿著衣襪時,記得要反轉檢查清楚,我一向對小朋友嘅安全都非常重視,冇諗過呢啲事會發生喺自己身上,幸好一切平安。」


資料來源:ETtoday

相關文章