餵人奶必備用品List | Kylife與二寶之日常

繼之前我既人奶心路歷程後,今次就簡單講講餵人奶既必備用品啦。

首先如果選擇泵奶,第一樣需要當然係奶泵啦!

1, 奶泵 - 類型有以下幾種: 手動 / 電動 / 單泵 / 雙泵

當初我為了慳時間所以買電動雙泵想一次搞掂兩邊,不過後來用落發覺其實並唔係咁方便,而且係泵奶個時邊泵邊輕力推更加能清空乳房造更多的奶,所以我用用下就變了用單泵。

2, 哺乳枕

我原本用枕頭代替哺乳枕,但高度不合適下用多幾次反而引起腰部酸痛,所以各位務必要選用合適高度既哺乳枕呀,我自己係用產前講座送既哺乳枕(大家應該都知係邊間,可能因為依個原因個間既講座係特別難抽中)

3, 乳頭滋潤膏 / 羊脂膏

餵奶前我以為只有姿勢唔岩先會造成乳頭痛楚,但原來就算姿勢正確亦會出現疼痛! 相信各位媽媽同我一樣喺初頭餵奶時,乳頭短時間內受寶寶不斷磨擦而形成痛楚,每每再要餵奶時其實真係好驚! 而我當時唯一急救方法就係餵兩餐奶之間短暫滋潤吓乳頭!

4, 綜合維他命及益生菌

相信大家係懷孕期間亦有服用不同既營養補充劑,若果餵奶期間維持服用,無形中亦可帶到額外營養比寶寶,所以我都有KEEP住食嫁!

5, 儲奶袋 / 儲奶杯

雖然我是埋身餵的媽媽,不過我盡量都會儲定少量奶放冰格做儲備!


6, 哺乳內衣

對於每天要不停泵奶或埋身,一件無鋼線的哺乳內衣係超方便的!

7, 乳墊

我記得曾經有位哺乳媽媽係健康院餵奶時先發覺原來無痴到乳墊出街,結果非常狼狽要即刻用紙巾墊著。

如果選擇埋身餵奶,除左上面的物品外都需要以下的物品啦!

1, 餵奶巾

無疑係外出餵奶既必備既用品啦!

2, 仿乳頭保護罩

如果各位唔想用乳頭滋潤膏 / 羊脂膏,可以考慮選購仿乳頭保護罩保護乳頭減少因餵奶造成的痛楚。

我既人奶之路至今維持左兩個幾月,捱過左初頭辛苦既階段但又未到寶寶出牙仔既另一痛苦階段。其實餵人奶無疑係增添同寶寶之間既互動,而且又可以提供到足夠營養比寶寶,真係幾辛苦都值得既,而且有時見到佢望到奶奶既興奮表情真係好搞笑嫁,祝各位人奶媽媽都輕輕鬆鬆渡過依段同BB既特別時光呀!

 

每週小煮意食譜、二寶日常點滴、親子好去處、淘寶好物,就follow我哋啦!
Instagram:IG連結 專頁:Kylife與二寶之日常

 

相關文章