BB可以食芝士嗎?幾大可以飲水?拆解副食品3大迷思!

1. bb幾大可以開始飲水?
母乳同配方奶有88%係水分,6個月以下嘅bb嘅主食係奶,即使已經開始加固量都唔多,攝取嘅水分係足夠嘅,額外補充水分可能會佔用咗部分胃容量而影響奶量,所以唔建議飲水。

6個月以上嘅bb副食品會越食越多,奶量會減少,可以喺餵副食品時畀bb飲水,一日嘅總量大約等於一餐奶嘅份量就足夠。


2. 副食品可以加鹽 / 調味料嗎?
好多家長認為加少少鹽或調味料可以令食物味道變好,bb會更願意食,但研究發現,加鹽與否同bb嘅食慾其實冇咩關係,反而太早食用鹹嘅食物,以後會比較「嗜鹹」,所以「嗜鹹」同「嗜甜」唔同,「嗜甜」係天生嘅,「嗜鹹」係被「訓練」出來。因此,建議1歲前嘅副食品唔好加鹽或調味料,但如果一定要加少少鹽,都不致於有太大影響。

3. 一歲以下bb可以食乳酪、芝士嗎?
全奶嘅蛋白質同礦物質含量好高,而且缺乏鐵質、維他命C等營養素,唔適合作為bb嘅主要食糧。建議1歲後先畀bb飲鮮奶,但少量嘗試全奶製品係冇問題嘅,8~9個月大嘅bb可以食少少芝士、乳酪或用全奶製成嘅食物,例如布甸、蛋糕等。建議家長選擇經過「巴斯德法消毒」(Pasteurized) 嘅產品,特別係芝士。


資料來源:田原香健康網

相關文章