小朋友唔肯自己瞓 原因同家長有關?3個方法解決小朋友睡眠問題

要小朋友建立良好睡眠習慣,家長嘅配合都好重要。爸爸媽媽要注意自己嘅生活習慣,如果喺小朋友瞓覺時開電視,嘈雜聲會影響佢入睡,仲會被電視聲吸引到佢走出廳,所以最好大人小朋友同一時間各自返房瞓。如果小朋友走出廳,父母要立即帶佢返入房,話佢知而家已經係瞓覺時間。基本上,如果你肯定小朋友喺房入面扭計大喊大叫,只係想吸引你注意,你可以堅持唔理佢,當佢明白大喊大叫都冇用,就會漸漸入睡。

如果家長唔放心,可以用第二個方法,就係等5分鐘先去睇佢,但只須安慰吓佢,唔可以同佢玩或者抱佢,逗留嘅時間唔可以超過1分鐘。如果你行開之後佢又再大吵大鬧,就要再等超過5分鐘先去睇佢,都係逗留1分鐘就走,如此類推。每次入房之前等待嘅時間逐漸加長,直至佢安靜為止。

仲有第三個較溫和嘅方法,就係家長可以留喺小朋友房陪住佢,但唔可以同佢講嘢同埋玩。

你可以採用其中一個適合自己同埋小朋友嘅方法。無論採用邊個方法,只要堅持同有耐性,小朋友嘅睡眠問題一定可以得到解決。


資料來源:衛生處家庭健康服務

相關文章