4招應對小朋友壞情緒

每個人都有情緒,小朋友都唔例外,而爸媽嘅責任就係幫助佢哋平復情緒。

應對子女壞情緒的技巧

1. 建立適當的規範,平心靜氣的制止

3歲以下嘅小朋友未有自行分辨啱同錯嘅能力,從小爸媽就要適當咁制止小朋友嘅不良行為,避免日後養成壞習慣。例如:當小朋友出手打人嘅時候,父母可以捉住佢隻手制止,然後話:「唔准」。每次小朋友出現不良行為時,如果大人能可以好果斷咁表示:「唔准」,小朋友就能夠明白「唔准」嘅意思,佢哋會調整自己嘅行為,但父母一定要心平氣和咁及時制止,喺小朋友面前做一次高EQ嘅示範。

2. 同理與接受子女負面情緒

每個人天生就有喜怒哀樂,所以冇必要強迫小朋友去壓抑自己嘅情緒。要求小朋友「唔好發脾氣」之前,家長應該先安撫佢嘅情緒,例如擁抱一下小朋友令佢平復心情,然後嘗試同理佢嘅感受:「我知你想繼續玩。」或者「你怕俾人搶玩具,所以先推開佢,係咪?」,而唔係即刻叫佢:「唔准喊」、「唔准發嬲」。當小朋友有被了解嘅感覺,情緒先至容易平復。

3. 鼓勵小朋友以替代方式處理衝突

等小朋友情緒平復啲,爸媽可以向佢哋解釋:「嗰個小朋友都好想玩,不如同佢輪流玩或者一齊玩好唔好?」雖然小朋友仲細未必可以完全明白,但係家長唔解釋佢就永遠都唔會明白。

家長應該用中立嘅詞語向小朋友解釋,例如:佢「攞」咗人哋嘅嘢,唔好話「搶」。亦都可以教佢用替代方式處理衝突,例如教小朋友講:你可以同弟弟講,等陣借俾我玩得唔得?

4. 教導小朋友用言語表達怒氣

研究指出,語言發展較好嘅小朋友,遭受到嘅挫折感都會比較少,因為佢哋識得以言語表達自己嘅需要,亦都可以講出自己嬲同唔開心嘅原因,不單止有助於宣洩情緒,亦都可以獲得其他人嘅了解同安慰。BB到咗1歲半說話會越嚟越清晰,而且使用嘅詞彙都會越嚟越豐富,呢個時候爸媽可以教導佢哋用言語而非肢體去表達情緒。

 

資料來源:壹讀

相關文章