5個訊號話你知BB係時候加固!

BB到咗4至6個月大,就可以開始食固體食物,幫助發育。但係每個BB嘅情況都唔一樣,到底幾時開始可以食固體?營養師提出五大訊號,幫助新手爸媽判斷幾時幫BB加固,同時提供兩款香蕉蓉食譜!



食固體食物 訓練BB咀嚼吞嚥

其實除咗補充營養,畀BB食副食品仲有好多好處。食副食品可以訓練BB咀嚼同埋吞食能力,可以為日後戒奶提早做好準備,亦可以提高BB對食物嘅興趣,將來盡早適應成人食物同埋飲食模式。

5大訊號提醒你BB應該加固

營養師指出以下5個行為都係BB可以嘗試副食品嘅徵兆:

1. BB嘅頭部同頸部都可以挺直,而且可以坐起身

2. 見到家人食嘢嘅時候會伸手靠近食物

3. 口水分泌增加,有時會做出咀嚼動作

4. BB對食物有興趣,而且伸手拎

5. BB食奶冇以前咁專心,時間變長

一次食一種食物 適應之後再更換

加固時,無論係水果定係蔬菜,每次都只可以畀BB試一種,連續食幾日就可以確認BB已經習慣而且冇敏感,之後先嘗試新食物。第一次可以食半茶匙,習慣之後再慢慢增加,建議畀BB 4至7日嘅適應時間。

2款香蕉副食品

香蕉蛋黃蓉:用水果做副食品嘅時候,好多父母都會諗起蘋果蓉,其實香蕉都係一種好食材。營養師建議,用三份一條香蕉整成蓉,再加入四份一個煮熟嘅蛋黃撈埋,咁就完成香蕉蛋黃蓉。

香蕉豆腐蕃薯蓉:用四份一條香蕉製成香蕉蓉,再將煮熟嘅番薯同埋豆腐撈埋,就完成一道營養豐富嘅香蕉豆腐蕃薯蓉!

 

資料來源:華人健康網

相關文章