如何處理分離焦慮?「不辭而別」係大忌!

當媽媽要出門將小朋友交畀其他人照顧嘅時候,小朋友就會扭計唔俾媽媽走,呢啲就係分離焦慮嘅表現。

心理學上認為:分離焦慮係小朋友情感同認知發展嘅里程碑,反映出小朋友對媽媽嘅依戀。


分離焦慮如何處理?

1. 切勿偷偷離開

舉個例,如果你同老公喺屋企好地地,見你老公粒聲唔出就出咗街,你會有咩感想?

其實小朋友都係一樣,出門前一定要同小朋友講拜拜。唔好覺得佢哋唔識聽,大部份六個月大嘅BB已經可以同父母溝通。如果小朋友喊,媽媽都要開開心心咁錫佢一啖先出門。

2. 照顧者的態度

媽媽唔喺度嘅時候,代替照顧BB嘅照顧者,唔應該講任何帶恐嚇性嘅說話,例如:你再喊媽媽就唔會返嚟,你再喊媽媽就唔俾你食奶……之類嘅威脅說話。

無論媽媽喺唔喺屋企,照顧者對小朋友嘅態度、家庭環境都唔應該有改變,小朋友先會有安全感,信任媽媽同家人嘅照顧,慢慢佢就會適應同媽媽分離,並同媽媽以外嘅家人建立安全嘅情感連結。

3. 玩僕匿匿

呢個遊戲可以好好控制分離焦慮嘅情緒,仲可以運用到社交範疇,幫BB學習說話技巧。例如,輪流講嘢,都可以幫助佢哋集中注意力。一歲左右嘅BB已經唔係一個遊戲嘅觀察者,佢哋已經係參與者,可以同大人積極互動。


有啲BB同媽媽分開時唔喊,但如果媽媽偷偷地走或者媽媽自己本身走嘅時候都忍唔住喊,到媽媽回家時BB就會覺得委屈,可能會透過不斷食夜奶,不斷搵媽媽來舒緩自己情緒。

 

資料來源:壹讀

相關文章