BB食飯慢吞吞?切忌養成「邊食邊玩」壞習慣!

專家認為, BB八個月左右進入爬行階段之後,手腳發育會更加成熟、有力,當爸爸媽媽發現BB將手上嘅物件快速又精準咁放入口,就可以考慮畀BB學習自己食飯,呢個時候畀BB練習用匙羹進食都會比較順利。

照顧者可以花多啲心思陪BB喺愉快嘅環境下一齊練習食飯,唔單止可以促進良好嘅親子關係,喺冇壓力同負擔嘅氣氛下都可以幫BB累積成功經驗,增加自信心,食飯就會成為日常生活中簡單又輕鬆嘅事。


強迫餵食會影響BB生理心理

如果想改善BB食飯慢嘅情況就應該搵出問題所在,而唔係一味以「食晒碗飯」為目標,當BB覺得食飯係一種痛苦又討厭嘅事,就會唔想再食,將來可能對食物有莫名排斥同恐懼感,有啲BB甚至會討厭強迫餵食嘅照顧者,所以會出現情緒唔穩定嘅哭鬧,長此落去,會影響BB嘅營養吸收同埋腸胃健康。


唔好養成邊食邊玩嘅習慣

畀BB一邊食一邊玩嘅食飯方法,啱啱開始的確可以加快食飯速度,但係就會養成唔專心食飯嘅習慣,甚至令BB覺得食得慢就可以玩耐啲,令食飯時間變長,就會慢慢變成惡性循環。另外,邊食邊玩會增加危險性,例如俾食物哽到甚至窒息。

專家建議,應該畀BB習慣每次只做一件事,例如食飯要專心、玩嘅時候盡情玩、瞓覺嘅時候專心瞓覺,咁做可以避免BB養成唔專心嘅生活習慣。專家提示,當落入「交換條件」嘅餵食方式,就好容易令BB日後冇得玩就唔肯食飯,照顧者可能要一直用新玩具、開電視或者電子產品來做交換先至可以令BB乖乖食飯。

 

資料來源:華人健康網

相關文章