【救救新手爸媽】日本專家教你3招 BB一覺瞓天光冇難度!

BB係父母嘅寶貝,同時亦都係麻煩嘅來源,尤其夜晚扭計喊唔停嘅時候,晚晚冇覺好瞓簡直係精神折磨。

其實要BB夜晚瞓個好覺並唔係一件難事,日本專門醫治夜哭嘅保母就認為,只要掌握好三個秘訣,小朋友就會瞓得好,快高長大。


1. 早上7點BB一定要起身

好多媽媽都認為BB瞓得越多成長得越快,但係日頭瞓太多反而會令夜晚瞓唔到,就同大人一樣。最好朝早七點叫BB起身,如果唔係瞓得越晏,到咗夜晚就越夜瞓,第二日又會好遲起身。夠鐘起身嘅時候可以將窗簾拉開,畀陽光照入房間,用溫柔嘅聲音叫醒BB。新手爸媽應該盡量同BB一齊早睡早起,一齊調整作息。


2. 調整BB日頭瞓覺時間

BB夜晚會唔會瞓得好就要睇佢日頭瞓咗幾耐。出世後兩個月嘅睡眠可以分為早睡、午睡同埋傍晚睡,但係隨着BB成長,就唔可以俾佢隨心所欲,日頭瞓覺嘅時間都一定要慢慢減少。下午五點後瞓覺會嚴重影響夜晚入睡,所以出世七至八個月之後就唔好比BB喺下午五點之後瞓覺。日頭可以同BB玩多啲,畀佢哋多啲活動嘅機會,夜晚都會好瞓啲。


3. 營造睡眠氣氛

瞓覺前30分鐘可以將燈光校暗,令退黑激素發揮作用, BB會更容易入睡。爸爸媽媽如果有用電腦或者智能手機就盡量唔好開機,否則有可能影響BB瞓覺質素。餵奶嘅時候,有啲BB會一邊食奶一邊瞓覺,呢個時候就可以輕輕敲下腳板底或者手臂,叫BB起身,避免BB瞓太耐。

 

資料來源:早安健康

 

 

相關文章