【家有掌上明珠?教女2大禁忌你要知!】

越嚟越多人想生一個聽教聽話嘅女,始終女仔嘅性格都比較文靜內向,亦都比較細心,識得體貼父母。雖然生女有好多好處,但係對女兒嘅教育都好重要,因為女仔需要嘅自我保護意識比男仔多,今日就同大家分享下教養女兒嘅一啲禁忌。

1. 忌窮養

我哋成日講「窮養兒富養女」,其實呢句說話都有一定嘅道理,雖然富養女兒唔係剩係指金錢上,但係金錢都佔好大部份。因為自細喺金錢上得唔到滿足嘅小朋友,內心會好自卑,長大後可能會變得過份節儉,形成咗錯誤嘅金錢觀,所以家長都要適當咁滿足小朋友。富養女孩呢句說話嘅真正意思係想家長從小培養女兒嘅氣質,開闊佢嘅視野,令佢見識更多。因為「富養」嘅女孩見多識廣、獨立、有主見、有智慧,所以佢哋好清楚自己想要啲乜嘢,乜嘢先真正值得佢哋追求。

2. 忌不獨立

好多父母認為女人唔需要太強,賺錢養家係男人嘅事,女人可以搵到份工,嫁到個好老公就得。其實呢種諗法係我哋對女孩子嘅狹窄偏見,而呢種偏見會限制佢哋嘅發展。女性要過得有尊嚴,一定要學識獨立,經濟上同埋性格上都要獨立,唔獨立嘅女性喺家庭入面冇地位,所有嘢都要靠人,依賴性太強,咁樣會令身邊嘅人好大壓力。

要培養小朋友嘅獨立性,首先父母要畀足夠嘅愛佢哋,抽更多嘅時間陪伴佢哋同埋給予適當嘅鼓勵,小朋友喺充滿愛嘅環境下成長,先會有獨立前行嘅勇氣。另外,家長要培養女兒處理問題嘅能力,唔好乜都幫佢哋做哂,做到呢兩點小朋友先會變得勇敢,將來即使離開咗父母或者身邊嘅人,都可以好好咁生活落去。

 

資料來源:iFuun

相關文章