【教小朋友駛乜打!】3個懲罰方法代替打罵

【教小朋友駛乜打!】3個懲罰方法代替打罵

小朋友犯錯,自然需要受到父母懲罰。但懲罰小朋友都要講求技巧,一旦用錯方法,不但對寶寶嘅行為起唔到糾正作用,仲有可能令寶寶變本加厲。

懲罰不等於打罵,萬一唔小心傷到小朋友,自己會後悔一世,仲有可能令小朋友留下陰影。以下有幾個懲罰方法,爸媽們可以根據不同情況選擇運用。


1) 失去某些特別待遇

每個小朋友都有一啲特別鍾意嘅玩意或者特別待遇,例如某套卡通片,某樣玩具,或者星期六可以夜啲上床瞓等等。當小朋友做出不當行為,家長可以剝奪佢嘅特權。但係,父母一定要慎重,唔可以一次過剝奪太多,同埋時間唔可以太長。如果第二日表現良好,可以適當增加特權作為獎勵。


2) 口頭警告或批評

例如,小朋友喺遊樂場因為同其他人爭玩具而打起上嚟,家長就要口頭警告:「出手打人係唔啱,今次係第一次,媽媽原諒你,如果同樣嘅事情再發生,你就冇得再落嚟玩!」。當小朋友再犯,就要馬上實施處罰。


3) 為自己的行為負責

例如,小朋友整爛咗人哋嘅玩具,父母可以要求小朋友將自己最心愛嘅玩具賠畀對方作為補償。以後佢就會明白,玩其他人嘅玩具時都要小心愛惜,否則會換來自己心痛嘅代價。家長要畀小朋友知道,對其他人造成損失係要補償,做錯事要負責任,要承擔後果。

 

資料來源:阿波羅新聞網

相關文章