【如何令寶寶乖乖食飯?】

如何令寶寶乖乖食飯?

自從寶寶開始加固,媽媽就會周圍搜羅寶寶食譜,精心挑選優質新鮮嘅食材,花儘心思炮製各式各樣嘅輔食畀寶寶。但往往事與願違,對於家長們嘅一番苦心,寶寶都會表示「唔領情」。餐餐餵飯好似打仗一樣,家長們應該點樣應對呢?


1) 最重要的是 「想食」

幾乎所有寶寶都有飢餓時覓食嘅本能,會知自己幾時食飽,有能力控制自己嘅進食時間同份量。對於已經加固嘅寶寶來講,最重要就係用餐嘅「規律性」,重點係要令寶寶有「飢餓感,想食嘢」嘅慾望。


錯誤做法:

有啲家長眼見寶寶某一餐食得少,擔心會餓親寶寶,就不停提供各種零食、點心,例如餅乾、水果等等,咁做好容易就會陷入「唔食正餐 —> 食大量零食 —> 唔食正餐」嘅惡性循環。


正確做法:

每餐飯都設定時限,例如30分鐘,30分鐘後無論食完與否都要收起食物,兩餐正餐之間唔會提供額外零食。如果下一餐開飯前,寶寶覺得肚餓,只可以畀水佢飲,或者玩遊戲分散注意力,畀寶寶適當體驗飢餓感。


2) 食飯要有食飯的樣子

經過上述第一個步驟,寶寶已經體驗到「飢餓感」,有想食飯嘅慾望。下一步就要幫助寶寶體驗食飯嘅樂趣。


錯誤做法:

錯誤的地方 - 例如嬰兒車裡、電視機旁、梳化上、床上、戶外等等。

花式餵飯 - 為咗餵寶寶食多一啖飯,有啲家長會施展渾身解數,唱兒歌、講故事,載歌載舞咁餵飯。寶寶邊食邊玩,注意力完全冇放喺食飯本身。

大人同小朋友分開食飯 - 全家望住寶寶一個人食飯,餵飯過程被家人全程圍觀。


正確做法:

寶寶食飯需要儀式感 - 洗手、戴圍兜、放寶寶餐具……每一次食飯都應該有固定流程。就餐地點應該同大人一樣,最好可以坐喺餐椅進食,而唔係由大人抱著。

大人小朋友一齊食 - 最理想嘅方式,係家長同寶寶一齊食飯。家長一邊自己食,一邊餵寶寶食飯。一方面可以向寶寶示範咀嚼嘅動作,另一方面亦都可以略為誇張地營造出輕鬆愉快嘅氛圍,寶寶好有可能會不自覺地開始模仿大人。

專心食飯 - 無論係睇電視、睇平板電腦、聽兒歌,定係玩玩具,所有同食飯無關嘅事情,都會影響寶寶對食物嘅關注,會對寶寶嘅飲食習慣產生不良影響。

 

資料來源:每日頭條

相關文章