【追著寶寶餵飯的5大壞處】

小朋友唔肯專心食飯係好多爸媽都會遇到嘅難題。為咗令小朋友食多啲嘢,爸媽們真係出盡法寶,甚至追住小朋友餵飯。餵一餐飯都要同小朋友鬥智鬥勇,大戰幾百個回合,結果飯就餵唔到幾多,家長已經急到半死。

但其實,進食係人類最原始嘅本能之一,爸媽們只需要引導小朋友自己進食即可。如果家長一直餵小朋友食飯,甚至「追餵」,不單止吃力不討好,仲會對小朋友造成嚴重影響。

【追著寶寶餵飯的壞處】
追餵除咗會影響小朋友嘅消化吸收而導致小兒肥胖,仲有可能對小朋友嘅身心健康同智力發展造成影響。

1) 影響小朋友的專注力發展
追餵係小朋友專注力不足嘅表現。如果家長為咗可以令寶寶「坐定定」,就畀佢睇電視、玩玩具,然後趁呢個時候餵飯,只會進一步破壞寶寶嘅專注力,甚至有可能影響佢日後嘅學習成績。好多小朋友升小學後上堂同做功課都唔專心,其實呢啲情況同追餵、邊玩邊食都有關係。

2) 不利於養成良好的生活規律
當小朋友嘅專注力放咗喺睇電視或者玩玩具,往往意識唔到自己喺度食緊飯,令佢哋無法形成「要喺固定時間食飯」嘅意識。咁樣會造成生活紊亂,影響小朋友嘅健康。

3) 影響孩子的自主意識和積極性格
作為一個獨立個體,食飯本來就係小朋友自己嘅事,應該由自己控制份量同速度。如果家長餵飯,會破壞咗呢種自主意識,小朋友會開始認為食飯係家長嘅事,自己嘅角色只係協助家長去完成任務。長此落去,小朋友嘅自主意識會變得薄弱,形成消極性格。

另外,餵飯時家長往往會催促小朋友食快啲,甚至因為急躁而鬧小朋友。呢種情緒久而久之會令小朋友覺得食飯係一種負擔,毫無樂趣,一樣會對小朋友嘅積極性格造成負面影響。

4) 孩子易形成「和家長傾條件」的思維方式
有啲父母餵飯時,為咗令寶寶合作,會一邊餵一邊承諾畀一啲好處寶寶。呢種做法一旦變成習慣,小朋友就會用食飯來同家長討價還價,換取利益。久而久之,小朋友會變得越來越任性、自私、經常發脾氣。

5) 影響孩子的精細動作發展和智力發展
小朋友自己食飯,需要手、嘴、眼嘅協調配合,如果用筷子食,動作就更加精細,需要更強嘅協調能力同平衡力。另外,有研究顯示,手部精細動作嘅良好發展同智力發展有關。長期餵飯對小朋友嘅動作平衡同協調,甚至智力都有不良影響。

如何讓寶寶養成吃飯好習慣
小寶寶一定要有固定嘅餐椅、餐具,安靜環境,令寶寶有食飯嘅「秩序感」。至於較大嘅幼兒,爸媽要喺飯前提醒同暗示:放低玩具,熄電視,專心食飯。

有啲小朋友唔肯好好地食飯,其實係想得到父母嘅關注,係一種「計謀」,爸媽們千祈唔好中計呀!唔食就立即將飯菜收起,餓佢兩餐,小朋友自然會掉返轉頭求你畀飯佢食。只要你捨得畀佢餓,肯定會有效!


資料來源:找話題

相關文章