【如何培養孩子的同理心?】

人類嘅同理心唔係天生,而係靠後天培養,所以小朋友缺乏同理心,唔會為別人著想其實好正常。一般而言,越有同理心嘅小朋友就越樂於助人,而呢種小朋友都會具備較好嘅社會適應能力同人際關係,有助於將來嘅發展。到底點先可以培養出有同理心嘅小朋友呢?

1) 多與孩子討論情緒與感覺
當小朋友見到父母抱住年幼嘅弟弟或妹妹,都會出現忌妒嘅情緒同行為,呢個時候如果父母冇作出適當處理及安撫,將小朋友嘅忌妒解讀成生氣,就有可能令到小朋友區分唔到忌妒同生氣,導致將來小朋友感受別人情緒時會出錯。

建議父母平時多啲同小朋友討論、溝通,幫助佢哋去區分各種情緒同感覺,同理心嘅表現過程必須先觀察對方嘅言行,然後解讀對方嘅情緒,最後先能夠表現出同理嘅行為。因此,如果父母經常同小朋友溝通、表達情緒,佢哋自然會識得分辦各種感覺,從而理解其他人嘅情緒行為。

2) 父母以身作則,成為孩子的榜樣
正所謂「言教不如身教」,父母親身示範總比講道理來得有效。現今父母,好多都成為咗「低頭族」,大部分時間都喺度玩手機,缺乏親子溝通互動,令小朋友覺得被忽略,某程度上會造成情緒上嘅起伏同不安。當小朋友嘅情緒唔穩定,又點會將心比心咁考慮其他人嘅感受?

3) 從遊戲中互動,學習同理他人
有啲小朋友嘅自我中心意識較強,建議家長不妨透過角色扮演遊戲,令小朋友學習站喺其他人嘅立場思考。例如,畀小朋友同公仔進行角色扮演遊戲,令佢哋有機會轉換唔同嘅角色,可以練習以其他人嘅立場表達感受。

父母亦可以運用繪本幫助小朋友標示感覺,例如描述離家嘅焦慮或者同父母分離嘅感覺等,透過講故事嘅方式去助小朋友標示各種感覺,從而培養同理心。

4) 多讓孩子接觸人群
父母應該畀多啲機會小朋友接觸人群,例如帶小朋友去公園玩,當佢觀察到其他小朋友因為玩唔到某遊樂設施而難過時,父母就可以幫小朋友描述呢種感覺:「我諗嗰個小朋友冇得打韆鞦一定好唔開心」,藉住日常生活中嘅經驗,引導小朋友同理別人嘅情緒,當小朋友日後遇到類似情況,就可以運用過往嘅經驗去表現出同理行為。

資料來源:華人健康網

相關文章