【如何培養出有承擔的男孩?】

男孩長大後將會係一個家庭嘅支柱,要承擔好多責任。男孩要有男子漢嘅意識,將來先可以成為一個「有膊頭,有腰骨」嘅好男人!

1) 培養好性格
爸爸可以多啲陪小朋友玩,帶佢去親朋好友屋企接觸外人,或者同大人一齊行街購物;盡量畀佢自己行,唔好成日抱!爸爸本身就有陽剛之氣對孩子有潛移默化嘅影響。當然媽媽嘅陪伴都好重要,媽媽教出嚟嘅小朋友一般學業成績都比較好。

2) 要學會自立
男孩自己嘅事要自己負責,例如打理自己嘅房間,清理自己嘅物品等;學業上,小朋友應該獨立思考,獨立完成功課,再自己檢查。心理上都要獨立,首先父母唔可以代替孩子去考慮問題,要畀孩子自己思考,尊重孩子嘅意見;咁樣小朋友將來先會有主見,為小朋友以後嘅成功打好基礎。

3) 積極面對挫折障礙
日常生活中,設置一啲障礙畀小朋友去面對。要孩子幫忙完成簡單家務,例如,吸塵、洗碗、執拾房間等,除咗精神上獎勵小朋友,亦都可以以物質作為獎勵,嚟提升小朋友嘅積極性。家長亦可以畀小朋友參加社會實踐活動,例如夏令營等。

4) 家長帶領孩子運動
由於家長忙,同小朋友少溝通,造成家長同子女嘅代溝越嚟越大,家長可以周末多啲同小朋友一齊跑步、打波、游水、旅行嚟彌補呢個缺憾。咁樣可以增加同小朋友嘅溝通機會,同時又可以鍛煉身體,一舉兩得。

5) 抵制誘惑
隨住電子產品嘅普及,好多小朋友都經常玩手機、電腦,家長應理智處理,同小朋友多啲溝通,可以由孩子鍾意嘅遊戲講起,增進彼此之間嘅了解,亦都可以同小朋友訂立協議,將玩手機、電腦嘅時間同形式規範化,幫助佢哋提高自我約束意識同自我管理能力。

家長應該鼓勵男孩子,多啲同老師溝通交流,努力提高學習能力,令小朋友同其他同學增進感情,鼓勵引導佢哋交朋友。

資料來源:雪花新聞

相關文章