【幼兒睡眠不足 容易出現行為問題】

睡眠不單只對嬰幼兒生長好重要,睡眠時間長短仲會影響小朋友嘅認知功能發展。美國麻省綜合醫院一項針對3~7
歲幼兒嘅研究發現,幼兒如果睡眠不足,日後會容易出現注意力不集中、情緒控制障礙、人際關係不良等問題。

小孩睡眠不足 日後容易出現行為問題
上述研究顯示,睡眠不足同睡眠充足嘅小朋友相比,睡眠不足嘅小朋友到咗7歲,喺注意力、工作記憶、推理能力同解決問題能力方面都有明顯落差,亦都經常出現行為問題。

美國麻省綜合兒童醫院兒科主任艾爾西‧塔斐拉斯表示,學齡前同啱啱開始返學嘅幼兒如果睡眠不足,到咗7歲,神經行為功能會比較差。

睇電視時間太長 導致睡眠不足
一般而言,6個月大至2歲嘅嬰幼兒,睡眠時間一般超過12小時,3~4歲嘅小朋友,睡眠時間一般超過11小時,5~7歲嘅小朋友,睡眠時間一般有10小時以上。研究亦發現,5~7歲嘅小朋友如果家庭收入較少,而其母親嘅教育程度較低,睡眠時間多數會少過9小時。其他小朋友睡眠不足因素,包括睇電視時間太長、身體質量指數(BMI)較高等。

塔斐拉斯表示,從嬰幼兒睡眠時間長短,就可以預測日後神經行為嘅好壞程度,呢項研究證實,小孩嘅睡眠質素同睡眠時間長短都非常重要。

資料來源:良醫健康網

相關文章