【正確掃風方法】新手爸媽必學

兩日前喺大角咀有一名3個月大女嬰飲奶後猝死,懷疑BB喺床上嘔奶後窒息致死。由於半歲以下嘅BB生理發育未成熟,飲咗落個胃而未消化嘅奶好容易嘔返出嚟。所以飲奶後必須正確為BB掃風,幫佢「嗝」返腸胃嘅空氣出嚟,減低嘔奶嘅機會。

一般情況下,BB飲咗2至3安奶就要掃一次風,如果掃咗 15分鐘,BB仲未將空氣「嗝」出嚟,就應該俾BB側躺,休息10分鐘後,再進行第二輪掃風。飲奶後,千萬唔好俾BB平躺,因為如果BB呢個時候嘔奶,嘔吐物好容易進入氣管引致窒息或吸入肺部。餵奶時,唔可以俾BB瞓喺度飲奶,咁做會令到啲奶「落唔到格」,容易導致嘔奶。

正確掃風步驟:
1) 把嬰兒放在家長大腿上;
2) 輕托起嬰兒的下巴和胸部或支撐其腋下,保持嬰兒脊柱垂直;
3) 用手由下而上輕掃嬰兒的背部,直至打嗝。

如果多次掃風後都唔成功,可能係掃風嘅手勢唔正確,應該請教一下母嬰健康院嘅姑娘正確嘅掃風方法。

資料來源:太陽報,ESDlife

相關文章